Over ons

Nos Vishon:

Hasi eventonan di bida un eksperensia memorabel.

Nos mishon:

Kompashon ta nos mishon!

Nos sa ku pèrdè un ser kerí no ta nada fásil. Ta p’esei nos a hasié nos mishon pa kombibí e momentunan difísil aki ku esnan ku ta keda atras, dor di trata di hasi e proseso mas fásil i leve ku ta posibel. Esaki nos ta hasié dor di brinda un servisio integral pa asina e famia i konosínan, por dediká nan tempu pa despedí optimalmente di e defunto stima.

Pa por garantisá un servisio profeshonal i ekselente na kada un kliente, regularmente e personal di El Tributo ta asistí na kursonan intensivo di kapasitashon den eksterior òf lokal. E hostessnan ku ta asistí e famia durante entiero por ehèmpel, ta kalifiká pa duna asistensia den kaso di krísis òf promé ousilio durante entiero.

Bou di e slogan “despedí ku dignidat” nos ta atendé tur detaye pa garantisá un despedida digno di e defuntu; sea ta trata di un seguro di entiero adelantá, regla santana, guia pa e proseso di luto, embalsamentu, kremashon, òf un rekuerdo manera un urn den forma di un hanger, keepsake of thumbies .

Sigui tira un bista riba nos wep sait pa bo por mira e diferente servisio, fasilidatnan i posibilidatnan ku nos ta brinda.

Nos Balornan:

E fundeshi di nos empresa ta ankrá den e siguiente balornan pa ku nos trato ku nos klientenan, gruponan di interes i nos personal:

• Rèspèt: Duna e mesun balor i trato ku nos tambe lo ke risibí di otronan
• Lealtat: Kumpli kabalmente ku lo ke nos a primintí
• Integridat i transparensha: Nos ta garantisá honestidat i transparensha den tur lo ke nos ta hasi
• Responsabilidat: Karga responsabilidat di nos akshonnan
• Servisio profeshonal: Invertí, riba un base regular den kapasitashon di tur ku ta enbolbí den nos organisashon
• Stabilidat finansiero: Promové kresementu duradero

Historia kòrtiku di El Tributo

Na e edat hóben di 21 Sr. Angel Nieuw a fundá e agensia funerario El Tributo, na Pietermaai 8 kaminda despues a bin e ofisina di SSC. Sr. Nieuw kende, na chikitu tabata biba banda di un seter, a disidí, despues di hasi negoshi den diferente otro área, pa lanta su mes funerario na aña 1944. Den e tempu aki El Tributo tabata buska defunto na kas, bende kaha di morto, krans i bela.

Semper Sr. Nieuw su punto di salida tabata pa dun’é despedida di e defunto un toke speshal i konstantemente e tabata bini ku ideanan inovativo pa por kumpli ku esaki. Pa e motibu aki mes Sr. Nieuw a sòru profundisá i kualifiká su mes den e área aki.

El Tributo, ta e promé agensia funerario lokal ku a introdusí un sala kaminda famia i konosínan por sinta i risibí bishita di kondolensia i tambe tuma despedida di nan defunto. Ta e mesun agensia funerario aki a bin ku promé santana ku no ta mara na religion: Morada Santa na Bottelier, na aña 1969.

E konsepto di plania bo entiero den forma di un seguro di morto, tambe ta un idea di Sr. Nieuw. Un produkto ku awendia a bira normal serka tur agensia funerario di Kòrsou. Tur esakinan a pone ku El Tributo den un tempu kòrtiku a bira un berdadero konsepto na Kòrsou, esta: Entiero ta El Tributo.

Na Desèmber 2005 Haidel Haile a tuma e batuta for di Angel Nieuw i a komprometé su mes, komo e direktor i propietario nobo, pa sigui brinda un servisio profeshonal i tambe sigui ku e tradishon pa sòru pa e famia haña un servisio di entiero digno pa nan defuntu. Algu ku hopi biaha ta sirbi di gran konsuelo pa esnan ku ta keda tras. Tambe Sr. Haile a sigui ku e tradishon di ideanan inovativo; un di e promé ideanan ku el a introdusí ta “hospitalidat”den entiero.

E servisio di “hospitalidat” ta enserá ku El Tributo por regla tur detaye tantu promé, durante komo despues di entiero.

Riba dia di entiero e famia por konta ku hostess pa asistí e famia, te den e mas mínimo detaye, durante e programa di entiero. Aparte di dirigí e programa i sirbi e invitadonan e hostessnan ta entrená pa duna asistensia tambe den kaso di krísis. Ku e servisio di hospilidat aki El tributo ke logra ku e famia ta haña sufisiente tempu pa tuma despedida di nan defunto. Foto Background hostess.

Tambe el tributo ta bini ku e konsepto: un entiero ku ta reflehá personalidat di e defuntu tempu ku e tabata na bida. Di e forma aki no solamente ta despedí pero alabes selebrá i rekordá e defunto su bida na su entiero.

Den e luna di desèmber di aña 2005El tributo ta organisá e promé Remembrance concert den e hòfi di Bottelier. Un konsierto kaminda artistanan tantu lokal komo internashonal ta presentá temanan konosí ku ta trata e diferente emoshon i pensamentu ku esnan ku keda tras ta sinti. Un konsierto ku kada aña di nobo ta atraé ku mas bishitante. Aña 2014 ta e di 10 bia ku ta organisá e Remembrance concert.

Den kuadro di e vishon: “Hasi eventonan di bida un eksperensha memorabel “a organisá e evento “Selebra bida” den 2014. Un konsierto riba Brionplein, kaminda diferente artista lokal a presentá pero tambe lidernan di diferente denominashon a reflekshoná riba e tema Selebrá Bida.

Durante e evento aki a tuma lugá e ‘kick off’ di e tour: Konfeshon di Kurason. Un inisiativa pa brinda hendenan ku tin un sekreto ta kana rònt ku n’e, oportunidat pa ekspresá esaki anonimamente. Na mes momentu esaki ta sirbi pa haña un bista di kiko ta biba den nos komunidat.

Un di e servisionan moderno ku e El tributo ta brinda ta: Life streaming di entiero, speshalmente pa esnan ku no por ta presente tòg por sigui e entiero di nan ser kerí.

Den su afan pa sirbi e kliente optimalmente, e servisio di El tributo ta ekstendiendo kada dia mas; kada bes ku detektá un nesesidat El Tributo ta konkretisá esaki den un produkto nobo.

I ainda tin hopi mas pa logra, paso ku mas di 70 aña di eksperensha, El Tributo ta e konsepto di entiero “Despedí ku dignidat” den nos komunidat.