Kiko pa hasi den kaso di un fayesimentu?
Na momentu ku un hende fayesé, esnan ku ta ked’atras ta haña un kantidat di kos pa enfrentá. Banda di e ferdrit, nan tin ku regla diferente asuntu tantu pa e entiero komo pa e kosnan práktiko.
Ta p’esei nos di El Tributo a traha un lista pa bo di e kosnan ku mester regla i/òf tene kuenta kuné.
Morto a kai …
Ora morto kai, semper mester yama un dòkter pa e konstatá morto. Asina esaki sosodé por yama El Tributo. Famia tin ku haña serka e dòkter 3 karta ku tin ku bai huntu ku e defuntu ora El Tributo bin buska e defuntu. Por fabor kita tur prenda i otro propiedat di balor for di e defuntu.
Buska e defuntu
Kliente ta yama El Tributo pa bin buska e defuntu na e lokalidat ku el a fayesé. For di kaminda ku nos busk’é nos ta hib’é El Tributo Otrobanda. E defuntu lo permanesé den frizer te dia tin ku prepar’é pa entiero.
Sita ku koordinadó di entiero
Un koordinadó di entiero di El Tributo ta yama famia di e defuntu pa traha un sita. Esaki por sosodé na kas òf na ofisina di El Tributo na Nieuwe Haven (Emancipatie Boulevard). Mira e “Checklist” pa e kosnan ku mester bini kuné.
Koordinashon di e entiero
Mester tin 1 enkargado. Esaki ta e persona ku ta punto di kontakto entre El Tributo i e famia. Famia tin ku bini ku, sea buki di kasamentu di e defuntu òf su sédula. Esaki ta pa nos por atendé e trámitenan na Kranshi, manera entre otro: pèrmit pa dera i akta di fayesimentu. Kranshi ta skirbi den e buki di kasamentu ku e persona a fayesé. E enkargado tambe tin ku trese su sédula.
Puntonan pa palabrá
Puntonan ku mester palabrá, pa semper keda tene kuenta ku deseo di e defuntu:
- Fecha di entiero
- Dianan di uso di frizer (e dianan ku e defuntu ta permanesé den frizer te dia di entiero)
- Anunsio den korant (ku òf sin potrèt), na radio i/òf televishon i Facebook
- Kaha: Tin eskoho di diferente tipo di modèl, koló i material
- Waha: Cadillac
- Flor pa riba e kaha, corsage, krans, flor di despedida, kusinchi/feneta, sinta pa dragers (kargadónan), i sinta pa krans
- Buki di kondolensia, mangel i sigá
- Misa, sala di El Tributo, Capilla na Bottelier òf otro kaminda
- Muzik i/òf kor
- ‘Catering’: kòfi, te, djus (esaki ta pa e famia i/òf bishitante na entiero)
- ‘Hostess’
- Ki dia famia ta trese paña ku ta dera e defuntu aden.
Kremashon
- Kaha di hür pa kremashon
- Oula na Krematorio si ta deseá
- Urna: tin urna di palu, nikel, serámika i bio-degradabel. Tambe tin e “Scattering tube”. Esaki ta un tubu ku ta usa pa stroi e shinishi, riba laman.
Forma di pago
Pago ta tuma lugá promé ku entiero. Por paga na efektivo, via banko i tin posibilidat pa swaip. Si e defuntu ta den un seguro manera: ENK, Extura, Onderlinge Hulp, AVM, ASKA, SVB, ACU, Seter, APNA òf otro, mester trese un komprobante di esaki.
Pa ke loke ta trata seguro di bida, famia tin ku tuma un deklarashon serka dòkter i hiba esaki pa e kompania di seguro konserni pa asina por haña un karta di garantia i trese esaki pa El Tributo.
Dia di Entiero
Famia tin ku buska defuntu na El Tributo Otrobanda, 1 ora promé, ku e ora di risibí bishita di kondolensia. Mester bini ku 6 ‘drager’ pa hisa i pone e kaha den waha. Akinan, e ‘hostess’, ku ta bai asistí e famia riba e dia akí, ta introdusí su mes. E ‘hostess’ ta sòru pa e famia haña “corsage” i ta tuma flor, krans i telegram ku yega na e sitio. Ademas, e hostess ta parti ko’i bebe pa e famia i tira bista pa tur kos kana bon. Na final e ta entregá famia e karchinan i e buki di kondolensia.
Konklushon
Despues di dia di entiero, famia ta pasa serka e koordinadó di entiero pa tuma e akta di fayesimentu, i kaba di regla gradisimentu den korant i plachi pa graf.
Feedback pa nos ta importante pesei nos ke sa tambe kon e famia a eksperensiá organisashon di e entiero.