Dera o kremashon?
Mayoria di hende ta duna di konosé di antemano kiko nan ke pa hasi ku nan restunan ora nan muri: Dera òf kremashon.
Den kaso ku e deseo di e defunto no ta konosí serka e famia, esakinan tin ku hasi un eskoho.
Aki na Kòrsou mayoria di hende ta skohe pa wòrdu derá, aunke e kantidat di hende ku ta preferá kremashon ta kresiendo.
Dera:
Den kaso ku ta dera e defunto, mester tene kuenta ku e siguiente puntonan:
- Mester di un kaha di morto. Na El Tributo Nieuwe Haven por skohe entre e diferente modelo di kaha.
- Mester di un kelder, boka òf graf. Mayoria bia e famia mes tin su kelder. Den kaso ku no ta asina, por kumpra un kelder, graf òf boka na Morada Santa na Bottelier òf un otro santana. Na Morada Santa di Bottelier tin e opshon pa kumpra e asina yama “derechonan di graf” pa un periodo di 15, 20 aña òf pa tempu indefiní.
- Famia ta responsabel pa e midimentu di e boka òf kelder.
- Den kaso ku e famia ta bai usa e mesun boka di graf ku ta kontené e restunan di un otro defuntu, mester tene kuenta ku ta te ku despues di 3 aña por bolbe habri e boka di graf, pa trasladá e restunan.
- E kantidat di restunan ku por bai den un boka ta 4 (defunto)
Kremashon:
Den kaso di kremashon mester tene kuenta ku e siguiente puntonan:
- Mester hür un kaha pa e kremashon
- mester di un urn pa hinka e shinishi di e defunto aden: tin urn di palu, nikel, i serámika. Den kaso ku ta bai stroi e shinishi riba laman tin e tipo ‘biodegradable’ i tambe e “Scattering tube”pa stroi e shinishi.
Ta bon pa tuma na kuenta ku lei di Kòrsou ta preskribí ku pa stroi e as riba laman, e famia i konosínan tin ku bai ku un boto por lo ménos 3 mia for di kosta di Kòrsou pa por stroi e shinishi.
Proseso di kremashon:
E organisashon ku ta enkargá ku kremashon aki na Kòrsou ta e fundashon: Crefona (Crematorium Foundation Netherlands Antilles).
E prosedura di kremashon ta lo siguiente:
El Tributo ta hiba kurpa di e defunto na Crefona. E kurpa ta wòrdu pone den un fòrnu speshal di e krematorio. E proseso di kremashon ta dura vários ora. Despues di e prosedura di kremashon, ta pone e shinishi den un urn i entregá esaki na El Tributo huntu ku e dokumentashon nesesario. E famia ta disidí kiko tin ku sosodé ku e shinishi di e defunto.