Repatriashon

Repatriashon

Repatriashon ta nifiká trasladá, den e kaso akí un persona ku a fayesé, di e pais kaminda e tabata promé ku el a muri, pa su pais natal. Un proseso bastante kompliká, ku ta eksigí intervenshon di diferente instansia, trámite i dokumentashon legal, tantu den e pais eksterior komo aki na Kòrsou.

Pero, aki tambe nos tei pa fasilitá abo den e momentunan difísil akí. A traves di añanan, El Tributo a konstruí kuidadosamente un ret di kontakto ku diferente agensia funerario rònt mundu, pa asina aliviá abo di e proseso kompliká akí.

Tin dos tipo di repatriashon: esun kaminda e defuntu tin ku bini for di un otro pais, esaki yama: Importashon i esun kaminda kurpa di e defuntu tin di sali for di Kòrsou pa bai un otro pais: Eksportashon.

Seguidamente un deskripshon en breve di kon tur e dos prosesonan akí tin ku kana.

Importashon:

Na momentu ku e persona muri den eksterior, e famia ta tuma kontakto ku un funerario aya pa notifiká ku ta bin dera/kremá na Kòrsou. E famia tin ku duna di konosé tambe ku ta El Tributo nan ke enkargá ku e entiero na Kòrsou.

E agensia funerario aya, lo hasi tur e trámitenan reglamentario i despues tuma kontakto ku El Tributo pa pone nos na altura riba ki dia i buelo e defuntu ta yega Kòrsou.

Riba e dia indiká, El Tributo ta sòru pa tin un waha di morto para kla na aeropuerto pa tuma kurpa di e defuntu i despues pon’é den frizer, pendiente di e dia di entiero òf kremashon.

Algun servisio ku El Tributo ta duna den kaso di importashon:

• Kontakto ku Embahada, Konsulado i agensia funerario di e pais;
• Kuido di e defuntu ora e yega Kòrsou;
• Regla e kaha di transporte;
• Regla transporte (inkluso e formalidatnan nesesario) pa e restunan por yega Kòrsou;
• Sòru pa e trámite i dokumentashon reglamentario pa por saka e kurpa for di Aeropuerto sin problema.
• Traha un presupuesto realístiko di e gastunan ku e repatriashon ta bai tresé kuné.

Eksportashon:

Den kaso ku e defuntu ta na Kòrsou, e famia ta notifiká El Tributo kua agensia funerario nan ke pa atendé e entiero den eksterior. Seguidamente El Tributo ta hasi tur e trámitenan reglamentario pa e famia, pa despues tuma kontakto ku e funerario na e pais en kuestion i pone nan na altura di e fecha i buelo di yegada di e defuntu. Tambe ta manda tur e dokumentashonnan nesesario di manera ku ora e defuntu yega, no tin ningun problema na aeropuerto. Famia di e defuntu tin e opshon di tene un seremonia di despedida aki na Kòrsou anto despues laga e restunan biaha pa eksterior, kaminda e famianan por bolbe tene un seremonia pa e defuntu.

Algun servisio ku El Tributo ta duna den kaso di eksportashon:

• Duna kuido i balsemá e kurpa, pa e kurpa keda konservá durante e biahe
• Regla e kaha di transporte i seya esaki
• Regla transporte pa e pais en kuestion
• Regla e formalidatnan, dokumentashon reglamentario ku ta rekerí na e diferente aeropuertonan internashonal
• Tuma i mantené kontakto ku agensia funerario den eksterior
• Traha un presupuesto realístiko di e gastunan ku e repatriashon ta bai trese kuné.