Mayoria di hende ta duna di konosé di antemano kiko nan ke pa hasi ku nan restunan mortal: Dera òf kremashon. Den kaso ku deseo di e defuntu no ta konosí pa e famia, famia mes tin ku hasi un eskoho. Aki na Kòrsou mayoria di hende ta skohe pa wòrdu derá, aunke e kantidat di hende ku ta preferá kremashon ta kresiendo.
Dera
Den kaso ku ta dera e defuntu, mester tene kuenta ku e siguiente puntonan:
- Mester di un kaha di morto. Na El Tributo Nieuwe Haven por skohe entre diferente modelo di kaha.
- Mester di un kèlder, boka òf graf. Mayoria di biaha e famia mes tin su kèlder. Den kaso ku no ta asina, por kumpra un kèlder, graf òf boka na Morada Santa na Bottelier òf na un otro santana. Na Morada Santa Bottelier tin opshon pa kumpra e asina yama “derechonan di graf” pa un periodo di 15, 20 aña òf pa tempu indefiní.
- Famia ta responsabel pa midimentu di e boka òf kelder.
- Den kaso ku e famia ta bai usa e mesun boka di graf ku ta kontené restunan di un otro defuntu, mester tene kuenta ku ta te despues di 3 aña por bolbe habri e boka di graf, pa trasladá e restunan.
- E kantidat di restunan ku por bai den un boka ta 4 (defuntu)
Kremashon
Den kaso di kremashon mester tene kuenta ku e siguiente puntonan:
- Mester hür un kaha pa e kremashon
- Mester di un urna pa hinka e shinishi di e defuntu aden: tin urna di palu, nikel, i serámika. Den kaso ku ta bai stroi e shinishi riba laman tin e tipo bio-degradabel, ku no ta hasi daño na nos medio ambiente i tambe e “Scattering tube” pa stroi e shinishi.
Ta bon pa tuma na kuenta ku lei di Kòrsou ta preskribí ku pa stroi e shinishi riba laman, e famia i konosínan tin ku bai ku un boto por lo ménos 3 mia for di kosta di Kòrsou pa por stroi e shinishi.
Proseso di kremashon
E organisashon ku ta enkargá ku kremashon aki na Kòrsou ta e fundashon: Crefona (Crematorium Foundation Netherlands Antilles).
E prosedimentu di kremashon ta lo siguiente:
El Tributo ta hiba kurpa di e defuntu Crefona. Ta pone e kurpa den un fòrnu spesial di e krematorio. E proseso di kremashon ta dura vários ora. Despues di kremashon, ta pone e shinishi den e urna ku e famia a skohe i ta entregá esaki na El Tributo huntu ku e dokumentonan nesesario. E famia ta disidí kiko tin di sosodé ku shinishi di e defuntu.