E kòmbersashon di un bida

E kòmbersashon di un bida

Bida. Tin asina tantu kos pa kòmbersá ariba. Teniendo e kòmbersashon di un bida por hasi e diferensia di un bida. E por yuda trese nos mas serka di nos sernan kerí atrobe, anto siña nos konosé nan di un forma mas profundo i diferente.

Nos tin ku papia

E parti mas difisil ta pa haña e manera ideal pa start un kòmbersashon asina ku un ser kerí. Ei mes, una bes ku e kòmbersashon start, lo bo ripará ku e ta sigui bai di mes. Un tep bon ta pa purba di nos hasi’é pisá òf negativo pero tene e kòmbersashon informal i no pisá. Ta bon pa tene kuenta tambe ku lo tin hende ku lo no ke tene e kòmbersashon i esei tambe nos mester respetá. En todo kaso semper ta bon pa hasi un intento pa splika di kon e kòmbersashon di un bida ta importante i kiko nos ke logra ku un kòmbersashon asina.

Bo bida a nifiká algu, bo a hasi un diferensia

Den profundidat di nos ser, mayoria di nos ta sinti e nesesidat pa sa ku, di un manera òf otro, nos a hasi diferensia durante nos bida riba e mundu aki– ku nos a nifiká hopi pa hende, i ku esnan ku tabata konosé nos i stima nos lo keda papia di nos, konta ken nos tabata, kiko nos a hasi i keda kòrda riba nos ku hopi amor despues di nos morto. Kada persona ta hasi un diferensia na su manera. Nos no ta para ketu kon tiki di e pensamentu di mas íntimo di nos sernan kerí nos konosé. E kòmbersashon mas importante di un bida ta laga e persona reflehá riba e diferensia ku el a hasi. I e ta trese famia mas serka. E ta sinti un satisfakshon ora e para ketu mira kon leu el a yega i ku apesar di tur desafio e t’ei ketu bai. Anto e ta yuda tene su legado bibu ora e no t’ei mas. Su desendientenan lo siña konosé fo’i unda nan a sali i mantené su historia i hazañanan bibu pa henter mundu pa semper. Bo ta sa kos ku bo no tabata sa i ku bo por kompartí ku mundu. I lo bo sa kon honra su memoria despues.

Memorialisashon

Ora di pena morto, memorialisashon – e akto di para ketu i honra bida di e ser kerí di un forma digno – pa rekordá e diferensia ku el a marka den nos bida, por ta un paso importante na kaminda pa sanashon.

Algun di e siguiente preguntanan por yuda na momentu di regla entiero:

•       Kiko ta e logro ku bo ta mas orguyoso di dje?
•       Kua konseho ku bo a haña serka bo grandinan bo no a lubidá nunka mas?
•       Kontami dje vakansi mas memorabel di bo infansia.
•       Kontami di bo mener òf yùfrou di skol favorito; kiko bo a siña serka dje?

Hasi e diferensia di un bida

Bo por tene e kòmbersashon di un bida ku kualke persona ku ta nifiká algu pa bo tokante di nan bida – bo kasá, mayor, yu, wela òf tawela, tanta òf tio. Mas ku klaro bo por tene e kòmbersashon tokante di bo mes bida tambe. Bo por tene e kòmbersashon kaminda abo i bo ser kerí ta sinti bosnan mes mas kómodo, por ehèmpel ora bosnan ta kushinando òf komiendo huntu, na kas òf hungando karta. E kòmbersashon por ta entre abo i bo ser kerí so òf bo por inkluí otronan manera famia òf amigu aserka. E kòmbersashon por tuma lugá ki ora ku bo ke – no solamente ora final di un bida ta aserkando. Si bo warda muchu kisas lo no tin okashon pa tene e kòmbersashon aki den tur trankilidat.

E mihó manera pa keda rekordá e hendenan ku nos stima mas ta pa sa kiko ta e kosnan ku nan ta haña mas importante. Tene e kòmbersashon di un bida ku bo ser kerí i haña sa tur lokual el a pasa aden durante su bida, lokual ta importante p’e i tur loke mas e ta balorá.

El Tributo su tim ta konsistí di profeshonalnan dediká na kuido, ku ta sostenébu i yudabu honra bida di esnan ku bo ta stima den e forma ku abo skohe pa memorialisá nan. Ora e momentu yega, konta ku nos lo ta kla pa yudabu. Pero promé ku esei probechá pa siña konosé bo sernan kerí mas profundamente posibel mientras esei por ainda. Tene e kòmbersashon di un bida awe.

Testimonio 1 – Tata

Yu: “Mi tata i ami ta papia di tur kos. Nos ta papia di nos buki i pelíkulanan favorito, kuminda i restorantnan ku nos gusta i naturalmente nos deporte favorito: beisbòl. Pero tòg nos no ta papia nunka over di E KOS DI MAS IMPORTANTE mes: BIDA. I e kosnan ku mas ta importá nos tur dos di bèrdat. Nos ta birando mas grandi. Nos no ta aki pa semper. P’esei ta importante pa nos konta nos historia. Kompartiendo historia di nos bida ku esnan mas importante den nos bida no ta importante solamente pa awe. Lo e ta partikularmente signifikante ora yega e momentu di honra e bida ku nos ser kerí a biba.”

Tata: “Loke ta importante pa mi ta pa mi konta mi yu tur e kosnan ku mi a hasi. E ta lagámi sinti ku mi bida a konta i ku mi a hasi un diferensia.”

Testimonio 2 – pareha

“Nos a konosé otro na skol i nos ta huntu te dia Dios manda yama nos. Nos a pasa den bientu i marea huntu. Pero nos a bati kabes i sigui. Semper nos a keda huntu. Nos a pasa hopi kos i nos a biba un bida fantástiko huntu. Nos yunan ta pará riba nan pia i a forma nan bibá kaba. Nos ta hopi orguyoso di nan. Nos a sinta ku nan i tene e kòmbersashon di un bida ku nan. Hopi kos nan no tabata sa di nos pasobra hopi biaha bo no ke broma ku lokual bo a logra. Nan a gosa ku nos a tene e kòmbersashon i nos tambe a keda hopi kontentu. Dia nos dia yega, nos yunan sa nos historia i nos deseonan. I nan por konta hende ken nan mama i tata tabata i kiko nan a logra. Tene e kòmbersashon di un bida ku bo yunan. Lo bo sintibu bon pasobra recordar es vivir i bo ta sinti ku bo bida tabata vale la pena.”

Testimonio 3 – Mama

“Awe si mi a papia ku mai mi mama. Tur dia nos ta papia. Pero nos NO ta ègt PAPIA.”

Kòmbersashon normal di tur dia:

Kon a bai awe? Ki b’a hasi? Ki b’a kushina? Kon ta ku e pia? B’a bebe bo remedi?

Pero ayera si nos a PAPIA por fin!

Mi tabatin miedu pa puntra mai kos di antes. Ma pensa ku un kòmbersashon asin’ei kisas lo a hasi’é tristu. Al kontrali. Su wowonan a kuminsá lombra, su tono di bos a subi i el a kuminsá konta ku hopi smak. Basta dia mi no a mira mai hari asina.

Kon bo a siña konosé pai? Kiko ta e kos mas importante ku bo a logra. Kiko bo ta mas orguyoso di dje? Kon bosnan a lanta? Kiko bo tin gana di hasi? Kon lo bo ke bo entiero? Bo tin miedu di muri? Kon bo ke muri? Kontami algu di bo mes. Di antes. Di mi antepasadonan. Kon bo ta kòrda bo infansia? Kiko ta e kos di mas mala mucha ku bo a hasi?

M’a sinti ku nos a biba un momentu spesial huntu. Mi n’ ta sa ku mai tabata baila. Mi a siña konosé hopi mas mihó. Anto nos a sera mas ku nunka. Tur e kos a kuminsá ora un hende a bisámi ku ta ora su mama a fayesé el a para ketu ku e no tabata sa hopi kos di su mama anto el a sinti ku el a pèrdè e oportunidat pa puntra pa semper.

N’ ta ora pa bo tambe tene e kòmbersashon mas importante di un bida ku bo ser kerí?”